تعويم الدرهم وعلاقتو بالكريديات وكيفاش غاياثر على الناس دالويب
 |
| تعويم الدرهم |
شحال من واحد ايتعجب علاش حطيت هاد الموضوع ولكن اخوتي موضوع كايهم
المغاربة كاملين الموهيم تبعو معايا
هادشي لي غيوقع لينا مجرد بداية غيصدمنا ديال بصح و غادي يبدل الوجه ديال المغرب، يعني غير تسناو الصدمة ، وباش تفهمو شنو غيوقع، تبعو مزيان
المغرب غارق في الديون، خداهم من صندوق النقد الدولي، حاليا واصلة الديون ديالو تقريبا (142,8 مليار درهم) وهاد البنك ماكيتفاكش، باش يسلفك الفلوس خاصو يضمن أنك أترجع ليه فلوسو (وبأسرع وقت) و سطرو مزيان على (و بأسرع وقت)، وباش يضمن هادشي تيدخل معاك في العظام و تفرض عليك شنو خاصو يدار فإقتصادك باش ترد ليه فلوسو دغيا،
قالو للمغرب عندك هاد الحوايج خاصك ديرهم، أولا، رفع الدعم عن المواد والسلع الاولية (مثلا الثمن ديال البوطة الكبيرة بلا دعم هو 120 درهم نتا كتشريها ب40 درهم، و لي بقا كتخلصو الدولة)، يعني الدولة مدام معندهاش الفلوس، خاصها تخلي الشعب يشري السلعة بفلوسو، بلا متعاونو الدولة، ولي معندوش ميشريش يقضي بالفاخر، بكل بساطة هاكذا تيفكر البنك الدولي، المشكلة أن بنكيران من بعد ما طبق هاد الإقتراح ديال البنك الدولي، الديون ديال المغرب مازال كتزاد، يعني بحالي تقول الخزينة ديال المملكة المغربية فيها تقبة، (للإشارة فقط الفلوس لي كتعاون بيهم الدولة المغاربة باش يقدرو يشريو السلع الأساسية كتسميها "صندوق المقاصة") وحاليا بدات كتلغيه بشوية بشوية ولغاتو على ليصانص و المازوط
وقريبا البوطة و الزيت و السكار و أتاي والتعليم و الصحةمعليناش، الخطوة التانية هي تحرير او تعويم الدرهم، صندوق النقد الدولي، قال للمغرب، شوف أشريف، بغيت فلوسي، وهاد الإجراءات لي درتي ماغتسلككش، ماعليك غير بتحرير العملة ديالك باش تقدر ترجع ليا فلوسي كاملين
هنا غنديرو سطوب، لحقاش هذا هو الموضوع المهم ديالنا، البنك فاش قال للمغرب هاد الهضرة قالها على واحد الأساس، و هو أن المغرب زعما حاس بالأزمة، وخاصو يطور راسو و يبني راسو باش يخرج منها، وبالتالي خاصو للضرورة يحرر العملة ديالو باش يقدر يزيد لقدام، وإلا بالطريقة لي غادي بيها غيحتاج وقت طويل باش يرد ليا فلوسي.
كيفاش ؟ بمعنى أن المغرب إلا كانت العملة ديالو القيمة ديالها طالعة، و مطلوبة، غادي يسهال عليه يخلص الديون ديالو. مثلا إلا المغرب ولا تيصنع الصوارخ، و العالم كلو محتاج الصوارخ ديال المغرب، يعني كلشي غادي يبغي يشري العملة ديال المغرب باش يخلص بيها، و بالتالي العملة ديال المغرب غتولي مطلوبة في السوق و زايدة في الثمن، و فاش المغرب غيبيع العملة ديالو بالدولار ولا بالأورو غيربح فلوس كثيرة، و يقدر يخلص بيها الديون، بكل بساطة هذا هو التفكير ديال البنك الدولي من موضوع تحرير الدرهم،
ولكن المغرب العملة ديالو ماشي محررة، علاش؟ لحقاش، المسؤولين ديال الإقتصاد في المغرب، عارفين العملة ديال المغرب ماكاين لي مديها فيها من غير ولاد بلادها، و بالتالي رابطينها بقيمة الأورو و الدولار في السوق في حدود ناحي 10 دراهم باش ماياكلوش الضق.
الخلاصة :
حنا كاملين عارفين المغرب ما تيصنعش الصوارخ ولا الكيماوي ولا الاسلحة ولا النووي، و ما عندوش لا الرغبة ولا العزيمة ولا حتى الإرادة باش يخلي المغرب يصنع أيتها حاجة تخلي العملة ديالنا مطلوبة في العالم باش العالم يشري من عدنا داكشي لي تنصنعو، و بالتالي فإن قرار تعويم الدرهم هو عملية إنتحار للإقتصاد المغربي، لي عاجلا أو آجلا غيكشط كاع المغاربة بسبب الغلاء باش يرد للبنك فلوسو، لي هو أصلا خداهم ومدار بيهم والو نهبوهم الشفارة و محاسبو حتى واحد فيهم واخا كلهم معروفين بالإسم و كل واحد شحال شفر، المغاربة غادي يغلى عندهم كلشي من أبسط الحوايج ونتا طالع... لحقاش القيمة ديال الدرهم غتنزل، وبلاصت ما كنتي كتشري ستيلو ب30 ريال غتولي تشري ب5 دراهم،
المشكلة الكبرى أن الدولة غتغمق على المغاربة من بعد ما تنزل قيمة الدرهم، بمعنى أن القيمة ديال السلع غتزاد 50% ولكن الصالير ديال المغاربة غادين يزيدو فيه 20% الشعب غادي يفرح و ماغاديش يظاهر كيف 20 يونيو 1981، ولكن فاش غادوز شهرين لا 3 شهور غادي يحس بالقالب ديال بصح...
و المغرب لي كتعرفوه دابا غيولي مجرد أيام غتوليو تعاودو عليها. و السبب أن الشفارة لي خداو القروض من البنك و شفروها و مخدموش بيها البلاد متحاسبوش. بكل بساطة. هوما يشفرو و الشعب يخلص ببساطة
الموهيم من هادشي كامل اتقولي ناس الويب كيغايتاثرو المشكل اخوتي هو انه اسعار النت غاتولي عالية بزاف والناس اللي كايشريو من الانترنت بكارط مغربية غادي يعانيو حيث سعر الدرهم ضعيف وتامن اي حاجة تالجيمرز غايتاثرو ولي كارت ستيم وداكشي ايولي غالي والبيسيات والبلايستيشن وبزاف دالحوايج حتى الجمارك اتخلص بزاف ومثلا لاشحنتي باراميكس ولا فيديكس استخلص بزاف حيث من التحويل للدولار للدرهم اتخسر بزاف
كان هدا مقال شامل حول تعويم الدرهم وعلاقتو بناس الويب كانتمنى تبارطاجيو وتنشرو المقالة على اوسع نطاق باش كاع الناس يعرفو الحقيقة وشكرا
يحيى 17 سنة مطور ويب واشتغل في مجال العملات الرقمية وعدة مجالات انشات هاته المدونة من اجل تطوير الويب العربي عامة والويب المغربي خاصة
مشيييينا فيها
ردحذف